Childrens Songs

অ’ চিত পখিলি
কচোন ক’ত পাই
সৰু পাখি দুখিলি ?
কোন দূৰ-দূৰণিত
পাৰিজাত ফুলনিত
আঁৰে আৰেঁ উৰি তই
কি ছবি দেখিলি ?
পোহৰৰ গুণ গাই
ফুটুকাৰ মৌ খাই
তোৰ দৰে ঘূৰি ঘূৰি
উৰিবৰ মন যায় ।
ৰ’দালিয়ে বীণ বায়
জিলিয়ে জুৰণি গায়
চেৱে চেৱে নাচি তই
কি সুৰ শিকিলি ?
(পাৰ্বতি প্রসাদ বৰুৱা)

 

অ’ বুলবুল অ’ তুলতুল
অ’ সেউতী তৰা
লুকা-ভাকু ভাল নালাগে
খেল কইনা দৰা ।
তুলতুল আমাৰ কইনা হওক
বুলবুল হওক দৰা
মই নামতী নাম লগাই দিওঁ
দৰাঘৰীয়াক যোৰা
অ’ সেউতী ই দৰা মাক
ঘট-টেকেলী ধৰা ।
কোৰোকাৰে দুৰলীতে
চাউল হব বালি
কচু পাতত শলাকানি
সেয়ে হ’ব চাকি
পানী-পচাত পানী তুলিম
দুৰণিৰ ঘাট গড়া ।
পাতাবাহাৰ পাত আনি
বেই খনি ল’ম সাজি
মিছা-মিছি হালধিৰে
দুইকো নোৱাম আমি
তৰাই ল’ব তুলতুলক
সেউতীয়ে বুলবুলক
দাঙি আনি বহুৱাম
বেই তলৰ পৰা ।
(ৰুদ্র বৰুৱা)

 
অ’ কুলি!অ’ কুলি! কুউ-কুউ-কুউ বুলি
আকৌ এবাৰ মাত,কুলি! আকৌ এবাৰ মাত,
নাকত যদি ধৰে লাজে
নাচাওঁ মই পাতৰ মাজে
ঢাকি তই ক’লা গাটি, লৈ কুঁহিপাত ।।
কুলি! লৈ কুঁহিপাত ।
কোনে ক’লে বিহুৰ কথা-কোনে দিলে জান,
লৈ আহিছ শিঙৰ পেঁপা, মৌ বৰষা গান,
ওচৰ চাপিল চ’তৰ বিহু
বাৰীত ফুলিল ছিঁৰাল-তিহুঁ
মলিয়ালে বাৰীৰ আম কোমল কোমল কুঁহিপাত ।।
কুলি! কোমল কোমল পাত ।
ৰৈ যা কুলি! মোৰে শপত, আৰু দুমাহ মান
নৈয়ে নৈয়ে উঠক নাচি দোকোল-টকা বান;
আম পকক্ যাবি লৈ
কঁঠাল পকক্ যাবি লৈ
কোন মুখে ঘূৰি যাবি লৈ শুদা হাত ।।
কুলি লৈ শুদা হাত ?
কুউ-কুউ-কুউ বুলি আকৌ এবাৰ মাত
(মিত্রদেৱ মহন্ত)

 

পোহৰ বিচাৰি যাওঁ
পোহৰ বিচাৰি যাওঁ
আন্ধাৰৰ কাল যৱনিকা ভেদি
সিপাৰে কি আছে চাওঁ ।।
পোহৰ বিচাৰি যাওঁ ।
দীনতা হীনতা ভুল ভেদ ৰাশি
দুৰতে বিদূৰি
আন্ধাৰ কূপৰ যত কীটৰাজি
সবাকে বিনাশি
নতুন যুগৰ মানুহ আমাৰ
নতুন শকতি
এই ধৰাতেই সজাই তুলিম
সৰগ ফুলনি
গাওঁ সুখগীতি গাওঁ
অচিন বাটৰ বাটৰুৱা আমি
যাওঁ আগবাঢ়ি যাওঁ
ভয় আশংকা নকৰো সমূলি
বিপদ বিঘিনি সকলো নেওচি
যাওঁ আগবাঢ়ি যাওঁ
পোহৰ বিচাৰি যাওঁ ।
দূৰণিত সৌৱা জিলিকিছে চোৱা
ৰিণিকি ৰিণিকি
জয়দেউলৰ জেউতি চৰাই
সোণৰ কলচী
আহা আগবাঢ়ি যাওঁ
আন্ধাৰৰ কাল যৱনিকা ভেদি
সিপাৰে কি আছে চাওঁ
পোহৰ বিচাৰি যাওঁ ।
(পৰাগধৰ চলিহা)

 
কিয় ৰৈ ৰৈ কেতেকী বিনাঅ’
অমাতৰ মাত
তোৰে সমনীয়া লগ চেমনীয়া
আহ উৰণীয়া মেলি দিও হাত
ৰ’দে বৰষুণে দুখ পাবি তাত ।।
জোনবাই ধৰি দিম
সখি পাতি ওমলিম
শিতানতে শুব দিম সোণৰ সঁজাত ।
চেনেহৰ চুমা দিম পাখি হেঙুলীয়া গাত ।
(কমলানন্দ ভট্টাচাৰ্য)

 
ৰ’দালি এ, ৰ’দ একণ দে,
মেঘবোৰ আঁতৰাই
বেলিটোক উলিয়াই
ৰ’দ একণ দে,
আকাশৰ মেঘ বোৰ, ক’ৰবালে নে ।।
কিন্ কিন্ কিন্ কিন্
বৰষিছে ৰাতি-দিন
কেনেবা লাগিছে মন
হ’ব আৰু দে,
সাৰি-পুচি মেঘ বোৰ ক’ৰবালে নে ।।
আমাৰেনো কেউফালে
চাচোন চা, ছেঃ
বোকাপানী লেটিপেটি
কিযে মহা দুৰ্গতি
ৰ’দালি এ…
(গগন চন্দ্র অধিকাৰী)

 
আগবাৰীত ফুলিলে
সোণে মোৰ চম্পা
সেউতী মালতী
সোণে মোৰ চম্পা ।
গোন্ধৰ গুটিমালী
ৰঙাকৈ ৰেৱতী
আমোলে মোলে ঐ
সোণে মোৰ চম্পা ।
সোণৰে পখিলা
ৰূপৰে পখিলা
ফুলনি জিলিকি উৰে মোৰ
সোণে মোৰ চম্পা ।
ক’ৰে বনৰীয়া
ফুটুকা ধুনীয়া
চৰায়ে বিনালে
অময়া সুৰৰে
সোণে মোৰ চম্পা
(জ্যোতিপ্রসাদ আগৰৱালা)

 

উৰা জাহাজৰ দুখন পাখি
চৰাইবোৰৰ দৰে
মানুহ তুলি পলকতে
আকাশলৈ উৰা মাৰে ।
নাওখনি চোন হাঁহৰ দৰে
পানীত ভাহি থাকে,
মানুহ-দুনুহ বয়-বস্তু
পানীৰে কঢ়িয়াই নিয়ে ।
মটৰ-গাড়ী চাৰিঠেঙীয়া
গৰু-ছাগলীৰ দৰে,
পেঁ পেঁ কৰি পেঁপা বজাই
মানুহ তুলি ফুৰে ।
ৰেল গাড়ী যায় চিৰিৰে বগাই
কেৰেলুৱাৰ দৰে,
দবাৰ পেটত ক’ত যে মানুহ
ভিন্ ভিন্ কাম কৰে
(বীনা বৰুৱা)

 
বনৰীয়া আমি বনৰ চৰাই
বনে বনে ফুৰোঁ অনাই বনাই
অনাই বনাই আমি
অনাই বনাই আমি
অনাই বনাই অ’ অনাই বনাই
উ-উ-উ-উ-উ-উ,উ-উ,উ ।
ভৈয়ামৰ মইনা তই পোহনীয়া পখী
বনৰীয়া মইনাৰে পতালিহি সখী,
ঘৰৰ কথা আমি বনত পাতিম
বনৰ কথা আমি ঘৰত পাতি
পৰ্বতৰ বননি ফুৰিম বগাই
অনাই বনাই আমি
অনাই বনাই আমি
অনাই বনাই অ’ অনাই বনাই
(জ্যোতিপ্রসাদ আগৰৱালা)

 

অ’ ফুল অ’ ফুল নুফুল কিয় ?
বগলী এ সবাহলৈ নগ’লি কিয় ?
অ’মা- দিন-ৰাতি ধৰি গছ বোৰে বাৰু
থিয় হৈ থাকে কিয় ?
নবহে নোশোৱে একোকে নকৰে
কথাকো নাপাতে কিয় ?
ফুল বোৰে মাথোঁ মূৰ দুপিয়াই
ঠেঁহ যেন লাগিছে তাক বুজা যায়,
সিহঁতৰ মাকেনো ঠেঁহ নাভাঙেহি কিয় ?
নবহে-নোশোৱে একোকে নকৰে,
কথাকো নাপাতে কিয় ?
পেহী অ’ পেহা, আমলখি কেঁহা,
টেকেলীপেটা গোবিন্দাই
জাল বাওঁগৈ আহা বান্ধৈ
জাল বাওঁগৈ আহা
আহা আহা আহাঁ, খেলো আমি আহা
বননিতে বহা,
অ’ খেলো আমি আহা কি ?
অলং দলং পৰিছে, ৰজা-ৰাণী আহিছে
কপৌ কুউ কুউ কুউ
(নিৰ্মলপ্রভা বৰদলৈ)

 


Leave A Comment

1 Comments

  1. A good collection but this section needs a bit of updating as the very few child artistes who are coming forward at the effort of their own and the encouragement of either their parents or well wishers need to be included along with their original songs(sung by none other but them) they’ve sung. Only then will their confidence go up and they would be able to perform better.Recognising established artistes is good but encouraging talented artistes is an equally good work.

Leave a Reply

Categories